0 Comments
Fyrsta starf eftir útskrift og hvað ertu að gera núna?
Deildarstjóri á leikskóla, síðan blaðamaður, ritstjóri, kennari og bóndi. Hver eru þín helstu áhugamál? Helstu áhugamál eru líklega sjálfbær búskapur og líferni og fólk. Allt sem fólk gerir, af hverju það gerir það og hvernig það reynir að bjarga sér, búa sér til sitt líf og heim með það sem það hefur. Hefurðu einhverja hjátrú sem þú brýtur aldrei gegn? Ég myndi aldrei grafa á álagabletti. Og ég er dauðhrædd við drauga..
Vefurinn er hluti af innleiðingu íslenska ríkisins á samningi UNESCO frá árinu 2003 um varðveislu óáþreifanlegs menningararfs sem tók gildi hér á landi árið 2006. Nánar má fræðast um UNESCO samninginn á heimasíðunni.
Tilgangur og markmið vefsins er, í samræmi við markmið samningsins, að auka þekkingu á menningararfi og efla vitund um og virðingu fyrir ólíkri menningu. Vilhelmína segir að heilt yfir hafi vinnan við vefinn gengið mjög vel: „Ég kom til starfa í byrjun sumars og byrjaði á því að kynna mér samning UNESCO frá árinu 2003 mjög vel. Þegar maður leggur af stað í svona verkefni þá þurfa forsendur þess og markmið að vera ljós. Þá kynnti ég mér einnig þau sjónarmið og viðmunarreglur sem orðið hafa til innan UNESCO um framkvæmd samningsins og hafa mótast á þeim ríflega 12 árum sem liðin eru frá því að samningurinn öðlaðist gildi. Þetta eru afar mikilvæg grundvallarsjónarmið sem varða m.a. þátttöku hópa og samfélaga sem nauðsynlegt er að hafa að leiðarljósi við smíði á vef eins og þessum. Vefurinn sjálfur var smíðaður og hannaður af veffyrirtæki. Svo fólst megnið af minni vinnu í því að hafa samband við hópa, félagasamtök og einstaklinga sem voru áhugasöm um verkefnið og voru tilbúin til að miðla af þekkingu sinni. Þetta var tímafrekt en afskaplega gefandi og í leiðinni kynntist ég skemmtilegu fólki sem miðlaði þekkingu sinni.“ Vilhelmína segir samning UNESCO menningararfs afar mikilvægt framlag eða tæki varðandi menningararfsvörslu: „Samningurinn færir sjónarhornið frá hinu áþreifanlega og efnislega að hinu óáþreifanlega í menningunni. Þ.e.a.s. að handverki, kunnáttu og ýmisskonar iðkun sem í felst mikilvæg þekking sem kann að vera mikilvægt að viðhalda og varðveita. Í þessu samhengi má taka það fram að í varðveislu samkvæmt samningnum felst ekki að það eigi að frysta eða staðla hefðir. Þvert á móti er gengist við þeirri umsköpun og endursköpun sem á sér stað sem og þeirri fjölbreytni sem finnst innan hefðarinnar. Þetta þarf vefur um lifandi hefðir að endurspegla og því má segja að hann sé viðvarandi verkefni. Að mínu mati er mikilvægt að efla vitund og virðingu fyrir ólíkri menningu ýmissa hópa og er vefurinn framlag til þess. Þannig vonast ég til að hann geti orðið framlag til þess að skapa og efla gagnlegt samtal um menningararf, varðveislu og viðhald.“ En nú þegar vefurinn er kominn í loftið, hver eru þá næstu skref? „Nú liggur fyrir að Stofnun Árna Magnússonar í íslenskum fræðum mun halda áfram að annast þennan vef. Næstu verkefni lúta að því að halda áfram að kynna vefinn, markmið hans og tilgang. Ég sé fyrir mér ýmis sóknarfæri á því sviði. Þá þarf að halda áfram að laða að skráningar frá áhugasömum einstaklingum og félögum. Þá myndi ég segja að leggja þyrfti sérstaka áherslu á að ná til hópa nýrra Íslendinga og fá að kynnast hefðum sem þeir taka með sér frá heimalandinu og stunda hérlendis. Vefurinn hefur fengið mjög jákvæð viðbrögð en það er mín tilfinning að mörg félagasamtök hafi hreinlega beðið eftir þessum vef. Ég vonast því til að hann fái að vaxa og dafna með þátttöku frá áhugasömu fólki og geti einnig orðið uppspretta skemmtilegra verkefna á sviði menningararfs,“ segir Vilhelmína að lokum. Fyrsta starf eftir útskrift?
Ég vann í hlutastarfi sem móðurmálskennari í Malmö í Svíþjóð í eina önn. Síðan sótti ég um fullt af styrkjum fyrir alls konar verkefnum. Það vildi svo til að ég fékk þá nánast alla. Nú hef ég mig alla við til að lenda ekki undir neinum af snjóboltunum sem ég rúllaði af stað í upphafi árs og eru nú orðnir risastórir. Sendið mér styrk, kæru vinir! (Ekki fjárstyrk, andlegan styrk!) Hvað ertu að gera núna? Ég er tónlistarkona og vinn hörðum höndum að því að klára mína fyrstu sólóbreiðskífu undir nafninu rauður. Samhliða því starfa ég að uppbyggingu alþjóðlega, femíníska kollektívsins/stórveldisins Synth Babes, með höfuðstöðvar í Malmö. Markmiðið er að stuðla að meiri fjölbreytni og kynjajafnrétti innan raftónlistar, sem og almennt hvað varðar tækniþróun og nýsköpun í tónlistarbransanum. Við skipuleggjum t.d. tónlistarhátíðir og vinnusmiðjur og tökum þátt í alls konar spennandi samstarfsverkefnum. Og búum til tónlist! Samhliða þessu hef ég fyrir hönd samtakanna Stelpur rokka! verið að stýra stóru alþjóðlegu samstarfsverkefni rokkbúðasamtaka í Evrópu, “Music Empowerment Mobility and Exchange”, styrkt af Erasmus+. Við héldum risastórar alþjóðlegar rokkbúðir fyrir ungmenni í Berlín í sumar, og svo ráðstefnu fyrir skipuleggjendur í Belgrad í haust. Samhliða því er ég að vinna í námsefnisvef fyrir börn sem eru að læra íslensku, í gegn um menningu og samfélag. Það er kannski það þjóðfræðilegasta sem ég er að gera um þessar mundir. En í byrjun næsta árs ætla ég að skella í eina eða tvær greinar upp út meistararitgerðinni minni og fara á ráðstefnu í Santiago de Compostela! Hver eru þín helstu áhugamál? Flest allt hérna að ofan! En tónlist er líf mitt og yndi, og ég elska hljóðgervla og tónlistarforritið Ableton Live. Hef líka mjög gaman að börnunum mínum tveimur og til allrar hamingju elska þau líka tónlist. Við syngjum mikið og dönsum um eldhúsgólfið, sænsku nágrönnum okkar til ánægju og yndisauka. Horfum samt líka mjög mikið á Netflix. Hef líka áhuga á náttúru og útivist, og sakna íslenskrar náttúru, og svei mér þá jafnvel veðráttu, mjög mikið. Hefurðu einhverja hjátrú sem þú brýtur aldrei gegn? Nei. Í lífi mínu er engin svoleiðis regla, eintóm ringulreið og kaos. Þykist samt stundum hafa hjátrú til að virka dularfull og töff, en gleymi jafnóðum hvað það var.
Fyrsta starf eftir útskrift?
Meðfram því að sækja um heillandi störf sem áttu sér snertifleti við þjóðfræðina skrifaði ég greinar í Kvennablaðið og hófst handa við að skrifa bækur. Hvað ertu að gera í dag? Þessa dagana er ég að byrja að máta við mig starfsheitið rithöfundur og er álíka feimin við þann titil eins og lærdómstitilinn þjóðfræðingur fyrst eftir útskriftina úr grunnnáminu. Ætli það gildi ekki um þessa fínu titla, eins og nöfnin okkar, að við þurfum tíma til að máta þau við okkur og kannski vaxa upp í þau? Mínar fyrstu bækur eru nú nýlega komnar út, barnabókin Jólasveinarannsóknin og skáldsagan Gríma, og meðfram því að fylgja þeim úr hlaði vinn ég að handritum sem vonandi verða að bókum á næstu árum. Hver eru þín helstu áhugamál? Bóklestur hefur alltaf verið mér mikilvægur og það minnkar ekki með aldrinum. Mér finnst fátt betra en hlamma mér niður með góða bók og það sakar ekki að hafa súkkulaðirúsínur í seilingarfjarlægð. Út af þessum sömu súkkulaðirúsínum reyni ég líka að vera hæfilega dugleg að hreyfa mig, skelli mér í ræktina eða í göngutúr, helst á flatlendi, en maðurinn minn dregur mig stundum með sér eitthvert upp í móti. Þar er útsýni oft gott. Ég á stóra fjölskyldu og undir þessum lið væri sígilt að svara því til að samvera með fjölskyldunni væri aðaláhugamálið (ásamt ferðalögum, (þá líklega með fjölskyldunni?)) og hvort sem er við hæfi að skilgreina fjölskylduna sem áhugamál eða ekki þá er mér að minnsta kosti mikilvægt að verja tíma með fólkinu mínu. Sonur minn sem situr hérna við hlið mér bætir því við að ég hafi líka mikinn áhuga á að skutla og að taka til. Þannig að þar hafiði það :) Hefurðu einhverja hjátrú sem þú brýtur aldrei gegn? … mjög margar og sumar þeirra sérkennilegar; svo sérkennilegar að þær eiga kannski fremur skylt við áráttuhegðun en „heilbrigða“ hjátrú. Í mínu daglega lífi er fjölmargt sem ég hef tamið mér að gera af því að ég tel það vissara - og fyrir því eru rök sem ég átta mig á að eru sérviskuleg en eru mér samt mikilvæg og veita vissa öryggiskennd. Svipað eins og að leggja inn gott orð eða biðja bænar. Af þekktum hjátrúarhefðum má nefna að mér þykja mánudagar óhentugir til ýmissa hluta, ég geng ekki undir stiga og breyti fyrirhugaðri göngu-eða akstursleið ef svartur köttur þverar veginn. Líka ef hann skáskýtur sér. Og mögulega líka þó hann sé alls ekki svartur… til að vera viss, sjáiði! Fimmtudaginn 22. nóvember munu tveir þjóðfræðingar, Katrín Dröfn Guðmundsdóttir og Vilhelmína Jónsdóttir, kynna efni nýlegra MA ritgerða sinna í Odda 106 í Háskóla Íslands kl. 17:15-18:30. Eins og við vitum öll eru ritgerðir í þjóðfræði einstaklega áhugaverðar og skemmtilegar. Eftir fyrirlestrana munum við svo fara á Stúdentakjallarann og fá halda fjörinu áfram. Hlökkum til að sjá ykkur! Katrín Dröfn Guðmundsdóttir
Áhrif sundlauga: líðan, upplifun, hegðun Í erindinu fjalla ég um rannsókn og efni lokaritgerðar sem ég skrifaði í meistaranáminu mínu í þjóðfræði við Háskóla Íslands. Efnistök ritgerðarinnar eru áhrifaþættir á líðan, upplifun og hegðun þeirra sem sækja sundlaugar á Íslandi. Sundlaugar hér á landi þjóna mikilvægu hlutverki í lífi þeirra sem sækja laugarnar reglulega. Afmarkaði ég rannsóknina við þann hóp sem fer í sund til að vera einn með sjálfum sér og upplifa oft á tíðum endurnærandi áhrif. Mun ég gera grein fyrir rannsóknarferlinu sem og lýsa helstu þemum ritgerðarinnar. Vilhelmina Jónsdóttir Meistararitgerðin „Að fortíð skal hyggja ef frumlegt skal byggja – nýtt miðbæjarskipulag á Selfossi” fjallar um tilvist fortíðar í samtímanum. Ritgerðin byggir á eigindlegri rannsókn, aðallega djúpviðtölum sem tekin voru á tímabilinu október 2016 til desember 2017. Um er að ræða tilviksrannsókn þar sem nýju miðbæjarskipulagi á Selfossi eru gerð skil. Í tillögunni um nýjan miðbæ er fyrirhugað að endurgera ríflega þrjátíu hús sem áður stóðu víðs vegar um landið en brunnu, voru rifin eða eyðilögðust með öðrum hætti. Viðmælendur vörpuðu ljósi á með hvaða hætti fólk upplifir fortíðina og hvernig tengsl við hana verða til í gegnum úrvinnsluferli merkingarmyndunar. Efnisleg fyrirbæri, líkt og hús, eru ekki nauðsynleg í þessu ferli en geta verið sem tæki eða verkfæri í ferlinu. Fram komu ólík sjónarmið til sanngildis og þess hvort og með hvaða hætti tillagan um nýjan miðbæ á Selfossi ber fortíðinni trúverðugt vitni. Í viðhorfunum birtist mikilvægi þess að húsin sem fyrirhugað er að endurgera hefðu merkingarbæra sögn í hugum íbúa sem og að þau féllu að söguvitund þeirra og þekkingu. Fram kom með hvaða hætti sviðsetning á fortíðinni féll að sjálfsmynd bæjarbúa og hvernig hún hefði áhrif á ímynd bæjarins. Þá kom einnig fram mikilvægi þess að íbúar hefðu möguleika til að hafa áhrif á ákvörðunartöku um uppbyggingu á miðbænum sem og möguleika til áhrifa og umsköpunar.
Á heimasíðu Þjóðminjasafnsins segir:
Með þessari spurningaskrá óskar Þjóðminjasafn Íslands eftir liðsinni almennings við að safna upplýsingum um afstöðu fólks til loftslagsbreytinga af mannavöldum, hvaða áhrif þær hafa á líf þess og hvernig það ímyndar sér framtíð með eða án loftslagsbreytinga. Umræður um loftslagsbreytingar af mannavöldum hafa lengi verið í sviðsljósinu en eins og kunnugt er getur hnattræn hlýnun haft afdrifaríkar afleiðingar í för með sér fyrir allt líf á jörðinni, samfélög manna og daglegt líf. Samkvæmt rannsóknum á veðurfari eru loftslagsbreytingar af mannavöldum nú þegar til staðar og meðalhitastig í dag er umtalsvert hærra en fyrir iðnbyltinguna í lok 18. aldar. Spurningaskráin er lögð fyrir á Íslandi, í Noregi og í Svíþjóð en hún er hluti af rannsóknarverkefni með heitinu Framtíðin er núna, tilvist og fyrirmyndir í umræðunni um loftslagsbreytingar. Sjá nánar á https://future.w.uib.no/.
Hvað var fyrsta starfið þitt eftir útskrift?
Ég gerðist aðstoðarkennari við HÍ þegar ég var enn í MA-námi. Ég hef síðan þá verið að kenna. Annað starf sem tók við eftir útskrift var að selja ís á Borough Market í London sem er matarmarkaður. Því miður er ástandið þannig í London að flestir sem voru að vinna við að selja osta og ís á þessum matarmarkaði voru með meistara- eða doktorspróf úr hug- eða félagsvísindum. Hvað ertu að gera í dag? Í dag er ég lektor við Listaháskóla Íslands og kenni tvo námskeið á haustönn: námskeið um sögur og sviðsetningar, og annað um listir og sjálfsmyndir. Ég er einnig að leiðbeina fjórum BA-ritgerðasmiðum sem allir eru að læra hönnun. Þau eru að skrifa um tyggjóklessur, sjónarhorn mannsins á náttúruna, dyra- og póstkassamerkingar og húmor í hönnun. Þetta eru allt verkefni þar sem þjóðfræðin kemur að góðu gangi. Í dag er ég samt aðallega að bíða eftir að bók mín og ljósmyndarans Svölu Ragnardóttir komi úr prentun. Hún heitir Krossgötur og er um álfatrú, alfabyggðir og bannhelga staði víða um landi. Við höfum verið að vinna í henni í fjögur ár. Það hefur verið mjög huggulegt að fá að dvelja svona lengi með álfum og álfasteinum, sérstaklega þegar ástandið er svona svart varðandi loftlagsmálin, þá getur þjóðfræðingur að minnsta kosti beitt sér fyrir því að óspillt náttúra fái að halda sér. Líklegast væri best ef öll óspjölluð náttúra væri séð sem bannhelg. Hver eru þín helstu áhugamál? Mitt helsta áhugamál er að drekka kaffi á Pallett kaffihúsinu í Hafnarfirði á meðan ég tek mér góðan tíma til að grúska í einhverju skrýtnu: gömlum fréttum eða bókum, timarit.is og ismus.is eru í miklu uppáhaldi. Svo finnst mér reyndar mjög gaman að vera með fjölskyldunni minni og fara með börnunum á róló, í sund eða í Fjölskyldugarðinn. Kannski finnst einhverjum það hljóma eins og lygi, en mér finnst til dæmis mjög gaman að róla aftur, nú á gamals aldri. Er einhver hjátrú sem þú brýtur aldrei gegn? Ég gæti ekki raskað ró álfa og ég á mjög erfitt með að stíga á grafir, þótt það sé stundum erfitt að forðast slíkt, eins og til dæmis á Fógetatorgi eða öðrum gömlum grafstöðum. Sagt er að London sé í raun einn stór kirkjugarður. Þannig að ... hvað veit maður? Þjóðarspegillinn, ráðstefna Háskóla Íslands í félagsvísindum, verður haldinn í 19. skipti núna föstudaginn 26. október. Ráðstefnan er haldin í október ár hvert. Um 170 fyrirlestrar eru fluttir í u.þ.b. 45 málstofum sem fjalla um það sem efst er á baugi í rannsóknum á sviði félagsvísinda á Íslandi. Frítt er á alla fyrirlestra ráðstefnunar. Hægt er að nálgast dagskrána í heild sinni með því að ýta HÉR Við höfum einnig tekið saman nokkrar áhugaverðar málstofur þar sem þjóðfræðingar halda erindi: |
Félag þjóðfræðinga á ÍslandiHér má finna allskonar skemmtilegar fréttir um viðburði, þjóðfræðinga, þjóðfræði og hvað sem er. Ef ykkur langar að koma einhverju á framfæri má senda fréttatilkynningar á felagthjodfraedinga@gmail.com Færslur
November 2023
|